من دوادح شاعر (البرود) صفوان المشولي

المستقلة خاص ليمنات

ليش تعطي الكحل رموش سودا وأجفان
و الندى من يكون.. تهديه مبسم وأجفان
واللي حَبك صحيح مثلي تبيعه للاشجان؟
الله المستعان
كم رياحين كم يا ورد شمين عرفك
واكتساك الضحى و البدر كم بات ضيفك
وانا ما اقدرش لا اشوفك و لا اقول كيفك
الله المستعان
كنت انا المستحق وحدي لنغمة برودك
وروحي كانت أحق بالعيش والنوم بيدك
وانت بس للضحى والورد تفتش خدودك
الله المستعان
الله المستعان.. مو جرى وا مليح
بسمتك من زمان تطعمه كل ريح
وانا دمعي ملان تحسبوه مش مليح
الله المستعان
أشتي البرود مثلي يذوق الجوى
شاشوف هل عاده شنسنس برود
شِرجع حمى يخلس اذا ما اكتوى
مثلي بنيران الجفا والصدود
من بعد ما قد كان نسمة هوى
يداعب ازهار الربا والورود
شاذكره كم قد جلس واستوى
على المباسم.. كم ربخ بالجعود
وبالخدود كم قد سرينا سَوَى
واليوم لاباليد ولا بالخدود